Билатерална средба на раководствата на АСО и на федералната АНО од Босна и Херцеговина
Регионалната соработка меѓу регулаторите во осигурувањето е многу значајна за реформските процеси кои во континуитет ја зајакнуваат заштитата на осигурениците и нивните права.
Со цел продлабочување, проширување и зајакнување на регионалната соработка меѓу регулаторите во осигурителната дејност, на поканата на Ели Дракуловска, претседател на Советот на АСО, денеска во Скопје на работна средба допатува високото раководство на федералната Агенцијата за надзор врз осигурувањето (АНО) на Босна и Херцеговина предводена од директорот Иван Лубуриќ, во состав Мирјана Вегар, помошник директор, Алма Смаилагиќ помошник директор за надзор врз друштвата за осигурување и за заштитниот фонд, Един Тасо помошник директор за надзор врз посредници во осигурување.
Членовите на Советот на АСО Ели Дракуловска, Александра Дранговска и Горан Здравковски заедно со претставници на стручните служби на билатералната средба со претставниците на АНО разговараа за регионалните аспекти на актуелните теми кои произлегуваат од предизвици за имплементација на регулаторните стандардите на ЕУ во областа на осигурувањето.
Размената на искуства и мислења за тековни и актуелните реформски процеси во двете земји даде идеи и простор за зајакнување на соработката која двете страни ја оценија како успешна.
Мај- месец на финансиска писменост: Започнува едукативно-информативната кампања „Информиран потрошувач е заштитен потрошувач“
Агенцијата за супервизија на осигурување (АСО) годинава како и секогаш досега во мај ќе го посвети на финансиската писменост со цел континуирано подигнување на свесноста за потребата од значењето на осигурувањето.
Под слоганот “Информиран потрошувач е заштитен потрошувач” овој месец ќе имаме бројни активности посветени на значењето на осигурувањето, објави на едукативни и информативни материјали, квизови и посети на воспитно-образовни институции.
Следете не секој ден на профилите на АСО на социјалните мрежи „Фејсбук“, „Инстаграм“ и „Линкдин“ за корисни совети како правилно да изберете осигурителен производ, да научите за ризиците и да знаете како да ги заштитите вашите права!
Воедно Ве покануваме да не контактирате и да организираме посета на образовната институција што ја претставувате со цел учениците да се запознаат со основите или да ги продлабочат нивните знаења за важноста на осигурувањето.
Билатерална работна средба АСО – АНО
Зајакнувањето и продлабочувањето на регионалната соработка меѓу регулаторите во осигурителната дејност е еден од врвните приоритети на раководството на Агенцијата за супервизија на осигурување. По тој повод на покана на Ели Дракуловска, претседател на Советот на АСО, денеска во Скопје на работна средба допатува претседателот на Советот на црногорската агенција за надзор на осигурувањето (АНО) г-дин Марко Ивановиќ, извршниот директор Бранко Барјактаровиќ, Марија Лаловиќ и Ивана Ѓуровиќ, стручни лица за регулатива, лиценцирање и правни работи.
Членовите на Советот на АСО Ели Дракуловска, Александра Дранговска и Горан Здравковски и претставници на стручните служби, на билатералната средба со колегите од Црна Гора одржана во просториите на АСО разговараа на актуелните теми и предизвици и приближувањето кон регулаторните стандардите на ЕУ во областа на осигурувањето. При тоа разменија искуства и мислења за актуелните тековни реформски процеси во двете земји и утврдија агенда за продлабочување на меѓусебната соработка која раководствата на АСО и на АНО ја оценија како плодна и успешна.
Претставниците на финансиските регулатори во земјава на панел дискусија со студенти по повод одбележување на „Глобалната недела на пари 2025“
Претставниците на финансиските регулатори во земјава на панел дискусија со студенти по повод одбележување на „Глобалната недела на пари 2025“
-Секој млад човек, започнувајќи ја кариерата, потребно е да размислува во насока на обезбедување на својата финансиска сигурност во иднина. Полисата за осигурување на живот е одлична прилика за осигурување од немили настани и за штедење. Преку оваа форма на штедење младите активно придонесуваат за својата лична и семејна финансиска стабилност во иднина. Воедно преку таа интеракција активно придонесуваат и за зголемување на финансиската писменост и финансиска инклузија кај населението, истакна Ели Дракуловска, претседател на Советот на експерти на Агенцијата за супервизија на осигурување (АСО) на панел дискусијата организирана од студентите на скопскиот државен универзитет „Свети Кирил и Методиј“ (УКИМ).
Во рамки на иницијативата на Универзитетското студентско собрание, а по повод „Глобалната недела на пари 2025“ вчера во Скопје беше одржана панел дискусија со работен наслов „Како познавањето на финансиите ја обликува твојата иднина“.На настанот покрај Дракуловска учествуваа и Анита Ангеловска – Бежоска, гувернер на Народната банка, Гордана Димитриевска – Кочоска, министер за финансии, професор Кирил Јовановски, комисионер на Комисијата за хартии од вредност и Дарко Саздов, член на Советот на експерти на МАПАС (супервизор на пазарот за капитално финансирано пензиско осигурување).
Во своето обраќање пред студентите за значењето на осигурувањето на живот врз долгорочната финансиска стабилност за секоја личност и нејзиното семејство, Дракуловска истакна:
Со оглед на промените на светот во кој живееме, исклучително е важно уште од најраните фази во кариерата на секој млад човек да свесно ја препознае потребата, поточно реалноста, дека е одговорен кон себе за обезбедување на својата финансиска сигурност, како и сигурноста на своето семејство. Во моментите кога ја започнуваме кариерата, мудро е да се мисли и на иднината, односно дел од заработката да се вложи во обезбедување на стабилност на животниот стандард и во подоцнежниот период од животот. За млад човек можеби и не е едноставно на почетокот на кариерата да размислува на „далечната“ иднина, меѓутоа напоменуваме дека никогаш не е доволно рано да се почне со вложување во финансиска сигурност.
Претставниците на финансиските регулатори се осврнаа и на значењето на финансиската писменост, за потребата од проактивност особено на младото население како и на мерките и активностите кои овие институции ги преземаат за унапредување на свесноста за потребата од финансиска едукација.
Соработка на АСО со австрискиот регулатор ФМА: Работна посета на Питер Браумилер за продлабочување на партнерството
Со цел зајакнување и продлабочување на соработката меѓу АСО и австрискиот финансиски регулатор ФМА денеска на покана на претседателот на Советот на експерти во работна посета допатува Питер Браумилер, висок претставник на департментот за супервизија на осигурувањето на австрискиот финансиски регулатор ФМА.
Претседателот на Советот на експерти м-р Ели Дракуловска и членовите на советот м-р Александра Дранговска и м-р Горан Здравковски и дел од стручните служби во АСО на средбата разговараа за состојбата на македонскиот осигурителен пазар и разменија мислења со високиотпретставник на ФМА за повеќе актуелни теми меѓу кои се: процесот на хармонизација на нашата регултива со Солвентност 2 стандардите, процесот за имплементацијата на меѓународниот сметководствен стандард ИФРС 17 како и за преземање активности за зајакнување на свесноста за преземање ризици и унапредување на правата на осигурениците и финансиската писменост.
На средбата беше констатирано дека повеќегодишната соработка меѓу двата регулатори е успешна и дека секако има простор и за понатамошно унапредување.
Започнува „Глобална недела на парите“: Финансиските регулатори со бројни едукативни активности, со фокус на дигиталните предизвици врз финансиската писменост
Агенцијата за супервизија на осигурувањето (АСО), Народната банка (НБ), Министерството за финансии, Комисијата за хартии од вредност (КХВ) и Агенцијата за супервизија на капитално финансирано пензиско осигурување (МАПАС) и во претстојниот период ќе спроведат бројни едукативно-афирмативни активности кои се со цел на подигнување на јавната свест за значењето на финансиската писменост. Со овие активности македонските финансиски регулатори активно ќе се приклучат во одбележувањето на „Глобалната недела на парите“ глобална акција за подигнување на свеста за потребата од финансиска едукација и финансиска инклузија.
Годинава на акцијата што традиционално 13 години по ред ја организираат финанските регулатори ќе се приклучат и асоцијации, компании и здруженија од приватниот и граѓанскиот сектор коишто се активни во доменот на финансиската едукација.
Глобалната недела на парите традиционално се одбележува преку предавања за различни возрасни групи, објавување едукативни материјали од областа на финансиите на интернет-страниците, одржување работилници со физичко присуство или онлајн, објавување едукативни содржини на социјалните мрежи.
Темата на која е посветена годинешната Глобална недела на парите е: „Размисли пред да „заследиш“, за безбедност на твоите пари во иднина“ (Think before you follow, wise money tomorrow).
Темата се осврнува на сложеноста на современите дигитални финансиски трендови, појавата на лица што даваат совети за финансиските инвестиции (т.н. „финфлуенсери“) и зголемената употреба на вештачката интелигенција при утврдувањето на веродостојноста на финансиските информации и совети, особено за младите. Понатаму, и емоционалната пристрасност и однесувањето, особено менталитетот на толпата можат да поттикнат лоши финансиски одлуки под притисок на врсниците или под влијание на социјалните медиуми.
Во овој контекст, од огромно значење е младите да развијат добри вештини за управување со парите, да препознаваат емоционални поттикнувачи и да стекнат критички пристап кон изворите на информации. Зајакнувањето на финансиската писменост може да им помогне на младите подобро да се снаоѓаат на финансиските пазари, да се спротивстават и да препознаат пристрасни совети што води до попаметни финансиски одлуки. Оттаму, темата на овогодишната Глобална недела на парите ги поттикнува младите луѓе да бидат исклучително претпазливи при носењето финансиски одлуки и користењето на современите технологии во финансискиот сектор.
Во рамките на одбележувањето на Глобалната недела на парите регулаторите и партнерите од приватниот сектор ќе организираат повеќе предавања за учениците од основните и средните училишта, децата од предучилишна возраст и за студентите. Воедно, секој ден ќе се објавуваат едукативни содржини на социјалните мрежи.
Во меѓународни рамки, Глобалната недела на парите се одбележува од 2012 година, со единствен прекин во 2020 година поради пандемијата, во организација на Организацијата за економската соработка и развој (ОЕЦД). Оваа глобална иницијатива, којашто досега се одбележува во повеќе од 176 земји во светот и со која се опфатени 60 милиони деца и млади, ја подигнува свеста кај младите за финансиската едукација и нивните знаења за парите, штедењето, вработувањето и претприемаштвото. Повеќе информации за Глобалната недела на парите се достапни на врската: www.globalmoneyweek.org
Комитетот за финансиска стабилност го усвои Годишниот извештај: Финансискиот систем е стабилен
Финансискиот систем и натаму е стабилен, додека ризиците се на умерено ниво. Ова е општиот заклучок во Годишниот извештај на Комитетот за финансиска стабилност за 2024 година, којшто Kомитетот го усвои на својата последна седница.
Во Годишниот извештaј се наведува дека домашниот финансиски систем покажува висока отпорност на шокови и успешно се справува со тековните предизвици. Во 2024 година, финансиските институции работеа во поповолно макроекономско опкружување, постигнаа солидни резултати и придонесоа кон продлабочено финансиско посредување.
Ризиците за финансиската стабилност што произлегуваат од различните сегменти на финансискиот систем се умерени, како и ризикот од „зараза“, односно прелевање на ризиците од еден во друг сегмент. Сепак, и натаму има одредени неизвесности, главно поврзани со надворешните фактори, како што се геополитичките тензии и економската фрагментација. Како мала и отворена економија, домашниот систем сѐ уште е изложен на надворешни шокови, поради што е потребна постојана претпазливост.
Во тој контекст, финансиските институции и носителите на макропрудентните политики треба внимателно да ги следат состојбите, заради одржување на финансиската стабилност. Финансиските регулатори ќе продолжат со координирано следење на состојбите, навремена размена на информации и доколку е потребно, ќе преземат соодветни мерки во рамките на своите надлежности. Тие располагаат со доволно инструменти за зачувување на финансиската стабилност, обезбедувајќи нејзино одржување и во наредниот период.
Комитетот за финансиска стабилност е меѓуинституционално тело одговорно за спроведување на макропрудентната политика и координација при следење на системските ризици и финансиските кризи. Него го сочинуваат претставници од сите финансиски регулатори: гувернерот на Народната банка, министерот за финансии, претседателите на Агенцијата за супервизија на осигурувањето (АСО), Агенцијата за супервизија на капитално финансираното пензиско осигурување (МАПАС) и Комисијата за хартии од вредност (КХВ), пет претставници од Народната банка и три од Министерството за финансии.
Известување за одложување на активностите по повод „Глобална недела на парите“
Агенцијата за супервизија на осигурување (АСО) во соработка и координација со другите регулаторни тела од финансискиот систем (НБРМ, КХВ, МФ и МАПАС) ја известува јавноста дека, поради трагедијата во Кочани ги одложува сите активности планирани со „Глобалната недела на парите“ (ГНП).
Уште еднаш изразуваме наше најдлабоко сочувство со семејствата на загинатите и со сите лица погодени во оваа трагедија.
За новите термини за одржување на ГНП јавноста ќе биде дополнително известена.